Breyttar reglur í Styrktar- og sjúkrasjóði LL og Starfsmenntunarsjóði LL (STALL)

Stjórnir ofangreindra sjóða hafa endurskoðað úthlutunarreglur lagt til breytingar sem stjórn LL hefur samþykkt og staðfest.  Nýjar reglur taka þegar gildi og eru birtar hér á heimasíðunni.

Í Styrktar- og sjúkrasjóði hafa reglurnar fengið töluverða „yfirhalningu“ og gerðar skýrari, bæði hvað varðar efnislegt innihald og ekki síður í útliti.  Helstu atriði sem má nefna eru; breyttar og rýmri reglur varðandi aðild, breytt fjárhæð sjúkradagpeninga (nú kr. 10.000 á dag en var áður 80% af meðalheildarlaunum síðustu 12 mánuði fyrir veikindi), flestar styrkfjárhæðir hækkaðar og vakin er sérstök athygli á aðstoð vegna sálfræðimeðferðar sem er gerð að sjálfstæðum úthlutunarlið og fjárhæðin verður nú kr. 4.000 í stað kr. 1.000 áður.  Þá er úthlutun fæðingarstyrks nú á hendi sjóðsins sbr. breytingar á kjarasamningi sl. haust og eru reglurnar einnig einfaldaðar á þann hátt að gegn framvísun fæðingarvottorðs barns og vottorði launagreiðanda um ráðningu og starfshlutfall (fyrir og eftir fæðingu barns) getur félagsmaður átt rétt á kr. 170.000 fæðingarstyrk og er það án tillits til þess hvort fæðingarorlof hafi verið tekið líkt og áskilið var skv. eldri reglum Fjölskyldu- og styrktarsjóðs BSRB.  Afla þarf fæðingavottorðs barns og er unnt að nálgast það hjá Þjóðskrá, Borgartúni 24 en vottorð frá launagreiðanda um ráðningarkjör (eyðublað) verður unnt að nálgast á heimasíðu LL innan tíðar.

Í Starfsmenntunarsjóði voru styrkfjárhæðir hækkaðar og í dæmaskyni má nefna að hámarksstyrkur var hækkaður úr kr. 100.000 í kr. 140.000, styrkur vegna aukinna ökuréttinda hækkaður úr kr. 75.000 í kr. 85.000 og vegna sérhæfðs lögreglunáms erlendis úr kr. 100.000 í kr. 140.000 (hámarksstyrkur).  Jafnframt var gerð sú orðalagsbreyting vegna náms erlendis að tengja slíkt nám skólum sem bjóða sérhæft nám fyrir lögreglumenn.