Áskorun frá slökkviliðs- og sjúkraflutningamönnum í Árnessýslu
16 ágú. 2013
LL tekur heilshugar undir hvert einasta orð í henni enda hefur LL margítrekað, bæði í ræðu og riti, vakið athygli á þessari grafalvarlegu stöðu sem uppi er, úti um allt land, í löggæslumálum þjóðarinnar. Ábyrgðin á þessu ástandi liggur hjá stjórnvöldum í einu og öllu þ.m.t. þegar illa fer.
Áskorun til stjórnvalda.
Deild Landssambands Slökkviliðs- og sjúkraflutningamanna (LSS) hjá Heilbrigðisstofnun Suðurlands (HSu) skorar á Alþingismenn og stjórnvöld að tryggja eðlilegt fjármagn til löggæslu í Árnessýslu.
Lögreglumönnum við embættið hefur fækkað úr 28 árið 2007 í 24 árið 2013 og stefnir allt í að lögreglumenn verði 21 nú um næstu mánaðamót ef aðgerðir stjórnvalda ganga eftir.
Ríkislögreglustjóri hefur áður sagt að hér þyrftu að vera starfandi 34 – 36 lögreglumenn svo hægt sé að sinna öllum þeim störfum sem krafist er af lögreglu.
Lögreglumenn og sjúkraflutningamenn vinna mjög náið að mörgum verkefnum. Fækkun lögreglumanna kemur niður á öryggi beggja og borgaranna sjálfra.
Stjórn deildar LSS hjá Hsu.