Syngja inn jólakveðju og skora á hin embættin
13 des. 2020
Lögregluþjónarnir Steinar Gunnarsson og Erna Rut Kristjánsdóttir hafa á Youtube birt fallegt myndband þar sem þau syngja jólakveðju frá embætti lögreglunnar á Norðurlandi vestra.
MBL greinir frá uppátækinu en þar kemur fram að þetta sé ekki í fyrsta sinn sem þau hafi brugðið á leik með þessum hætti. Á þau hafi verið skorað að endurtaka leikinn. Haft er eftir Steinari að þau hafi einfaldlega ákveðið að slá til, til að hressa upp á tilveruna á þessum tímum. Ekki veiti af.
Eins og sjá má í meðfygljandi myndbandi syngja þau Steinar og Erna Rut listavel. Í umræddri frétt skorar Steinar á önnur lögregluembætti, slökkvilið, Landhelgisgæslu, tollinn og fangelsin að gera slíkt hið sama. „Nú hendum við bara boltanum á önnur embætti,“ segir Steinar.
Jólakveðjuna hugljúfu má sjá og heyra hér að neðan.