Dómsmálaráðherra hefur nýverið kynnt áform um að fækka lögregluembættum úr níu í fjögur eða fimm. Útfærsla breytinga verður unnin nánar í ráðuneytinu og hefur ráðherra skipað samráðshóp fimm einstaklinga sem gegnir lykilhlutverki við þessa vinnu. Í hópnum sitja ráðuneytisstjóri ásamt skrifstofustjóra í dómsmálaráðuneytinu, ríkislögreglustjóri, formaður Lögreglustjórafélags Íslands og formaður Landssambands lögreglumanna. Dómsmálaráðherra hefur m.a. látið hafa eftir sér að tíu ár séu liðin frá síðustu breytingum á skipulagi lögreglunnar og tími til að taka næstu skref. Samfélagið hafi tekið breytingum og verkefni lögreglunnar einnig og styrkja þurfi embættin til framtíðar. Markmiðið séu öflugri lögregluembætti sem geti tekist á við breyttan veruleika, bæði innanlands og á alþjóðavísu. Breytingar eigi ekki að verða til þess að starfsfólki embættanna eða lögreglustöðvum fækki. Það sé þvert á móti skýr vilji til að efla löggæslu og halda áfram að fjölga lögreglumönnum.
Landssamband lögreglumanna fagnar því að þessi vinna sé að fara af stað og áttu formaður og framkvæmdastjóri m.a. nýverið fund með dómsmálaráðherra, aðstoðarmönnum og ráðuneytisstjóra þar sem þessi málefni voru meðal annars rædd. Stefnt er að því að frumvarp um breytingar verði lagt fyrir Alþingi með haustinu en ætla má að nái breytingar fram að ganga muni taka tíma að innleiða þær. Að fenginni reynslu mætti ætla að ný skipan þessara mála gæti öðlast gildi í fyrsta lagi 1. janúar 2028.
Þá áttu formaður og framkvæmdastjóri einnig nýverið fund með stýrihópi dómsmálaráðherra um stefnumótun í löggæslu en hópnum er ætlað að marka heildstæða stefnu, skipulag og framtíðarsýn fyrir íslenska lögreglu og greina þróun löggæslumála til lengri tíma. Markmiðið er að tryggja faglega forgangsröðun og skilvirka ráðstöfun fjárveitinga þannig að lögreglan geti byggt upp mannauð, búnað, tækni og verkferla með langtímasjónarmið að leiðarljósi. Stýrihópurinn mun einnig skilgreina skýra og markvissa mælikvarða til að meta árangur í löggæslu, einkum með hliðsjón af þjónustustigi og öryggi almennings.
Framangreindir fundir eru LL og lögreglumönnum mjög mikilvægir þar sem lögð var áhersla á mörg þau efni sem verið hafa í brennidepli, svo sem starfsumhverfismál lögreglumanna, réttindamál, starfsaðstöðu, fræðslumál, kjara- og stofnanasamninga, svo nokkuð sé nefnt.