Viðtal við forsætisráðherra í kjölfar mótmæla á gamlársdag
10 jan. 2009
Í fréttum Stöðvar 2, þriðjudaginn 6. janúar s.l. var viðtal við Geir H. Haarde, forsætisráðherra, vegna mótmælanna við Hótel Borg á gamlársdag 2008 hvar fram fór útsending Stöðvar 2 á hinni árlegu Kryddsíld. Óþarfi er að fjalla frekar um það sem þar gerðist enda hægt að sjá það í öllum fjölmiðlum landsins og í blogheimum.
Í viðtalinu sagði forsætisráðherra m.a:
„Það er auðvitað hörmulegt að, að, að, menn skuli fara með ofbeldi og trufla svona útsendingu og skemma tæki og jafnvel valda einstökum starfsmönnum þarna, hótelsins og Stöðvar 2 líkamstjóni. Það er ekki hægt að réttlæta slíkt.”
Athygli vekur að forsætisráðherra minnist ekki einu orði á það, í viðtalinu, að lögreglumaður skuli hafa verið kinnbeinsbrotinn af einhverjum þeirra aðila sem þátt tóku í mótmælunum.
Hægt er að sjá viðtalið við forsætisráðherra hér.
Opið bréf formanns LL, vegna ofangreinds viðtals við forsætisráðherra, birtist á bls. 23 í Morgunblaðinu 13. janúar.