Þing danska landssambandsins sett í dag
27 maí. 2009
Þing danska landssambandsins var sett í dag kl. 08:00 að íslenskum tíma. Peter Ibsen formaður landssambandsins setti þingið. Það er svolítið sérkennilegt að heyra að danska lögreglan á við sömu vandamál að stríða og sú íslenska, undirmönnun, álag og fjársvelti en talsverð fækkun hefur orðið á lögreglumönnum undanfarið í kjölfar sameininga á embættum. Ætli þetta séu samantekin ráð hjá ráðamönnum á norðurlöndum??
Auk Peter Ibsen héldu ræður þeir Jens Henrik Højbjerg, ríkislögreglustjóri. Claus Oxfeldt, formaður svæðisdeildarinnar í Kaupmannahöfn og Jesper Christensen, 1. varaborgarsjtóri Kaupmannahafnar. Lúðrasveit lögreglunnar í Kaupmannahöfn spilaði við upphaf og endi setningarathafnarinnar.
Þing danska landssambandssins eru haldin fjórða hvert ár. Síðasta þing var haldið í Árósum 2005. Það þing sem nú stendur yfir er það 71. í röðinni.
„Bikarinn er fullur. Stéttin er í upplausn. Hún þarf fólk. Hún þarf trú á betri tíð. Hún þarf í raun allt. Nú getum við ekki meir! Við höfum ekki lyst til að hlusta meira á tal um endurskipulagningu og hagræðingu. Nú er tími. Tími fyrir lögreglustörf“, sagði Peter Ibsen í opnunarræðunni og vísaði þá m.a. til þess að álag á lögreglumenn hefur aukist mikið með auknum verkefnum á meðan lögreglumönnum hefur fækkað. Eins og á Íslandi hafa fjárveitingar til dönsku lögreglunnar verið í öfugu hlutfalli við aukin verkefni.